14 август көнө Башҡортостан Республикаһының мәғариф минисрлығында туған телдәр уҡытыусыларын борсоған мәсьәләне күтәреүсе «Мәғариф өлкәһендәге яңы закондарҙы тормошҡа ашырыу шарттарында туған телдә белем алыу һәм уны өйрәнеүҙе ойоштороуҙың актуаль һорауҙары» темаһына арналған семинар-кәңәшмә үтте. Кәңәшмәлә Башҡортостан Республикаһының мәғариф министры Ә. С. Ғаязов, БР Ҡоролтайы Башҡарма комитеты рәйесе урынбаҫары Б.Р.Күсәбаев, БР мәғариф министрлығының милли мәғариф бүлеге мөдире Г.Г.Мөхәмәтйәнова һәм башҡа мәртәбәле ҡунаҡтар ҡатнашты.

Кәңәшмәлә белем биреүҙең сифатын күтәреү, башҡорт телендә мәктәп сайттары булдырыу, тыуған тел дәрестәрендә интеренет ресурстарҙы һәм алдынғы технологияларҙы ҡулланыу, туған телде һаҡлау һәм үҫтереү, уҡыу планында башҡорт теле дәрестәре һаны һәм башҡа милли мәғарифҡа ҡағылышлы мәсьәләләр күтәрелде.

Хәйбулла муниципаль районы мәғариф бүлеге 2014-2015 уҡыу йылында туған телдә белем һәм тәрбиә биреүҙе юғары кимәлдә ойошторғаны өсөн Башҡортостан Республикаһы Мәғариф Министрлығының рәхмәт хаты менән бүләкләнде.